ⵉⵙⴽⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵡⴰⴽⴰⵕⴰⵙ 15 ⵏⵓⵡⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⴹ ⵉⵎⴷⵉⵡⴰⵍ ⴰⴽⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵙⴽⴽⵉⵏⵏ ⵏ ⴱⵕⵕⴰ ⴷ ⵓⵎⵣⴰⵖ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵉⵕⵍⴰⵏⴷⴰ ⵎⴰⵙⵙ ⵛⴰⵕⵍ ⴼⵍⴰⵏⴰⵖⴰⵏ ⴷ ⵓⴽⴰⴱⴰⵕ ⴰⴳⵉⴷⵙ ⵉⵎⵓⵏⵏ.
ⴳ ⵓⵏⵎⵓⵇⵇⴰⵔ ⴰⴷ, ⵙⵎⵏⵉⴷⵏ ⵙ ⵙⵉⵏ ⴰⵏⴰⵡⵏ ⵏ ⵉⵎⵢⴰⵙⵙⴰⵜⵏ ⵏ ⵜⵉⴷⴷⵓⴽⵍⴰ ⴷ ⵓⵎⵢⴰⵡⴰⵙ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ, ⵏⵏⴰ ⵉⴱⵉⴷⴷⵏ ⵅⴼ ⵉⵣⴰⵍⵉⵡⵏ ⵉⵛⵛⴰⵔⵏ ⴷ ⵓⵡⵇⵇⵔ ⴰⵎⵢⴰⵖ.
ⴳ ⵓⵙⴰⵜⵉ ⴰⴷ ⵉⵙⵎⴰⵢⵏⵓ ⵎⴰⵙⵙ ⴰⵏⵙⵙⵉⵅⴼ ⴰⵙⵏⵉⵎⵎⵔ ⵏⵏⵙ ⵉ ⵉⵕⵍⴰⵏⴷⴰ, ⵉ ⵜⵏⴱⴰⴹⵜ ⵏⵏⵙ ⴷ ⵓⴱⵕⵍⴰⵎⴰⵏ ⴷ ⵓⵎⴰⴷⴰⵏ ⵏⵏⵙ ⵅⴼ ⵓⵙⴷⵓⵙ ⵏⵏⴰ ⵜⴼⴽⴰ ⵉ ⵜⴳⵍⴷⵉⵜ ⴹⴰⵕⵜ ⵏ ⵓⵏⴷⵓⴷⵉ ⵏⵏⴰ ⵉⵡⵡⵜⵏ ⵜⵉⴳⵉⵔⴰ ⵜⴰⵎⵏⴰⴹⵜ ⵏ ⵍⵃⵓⵣ, ⵉⵙⵙⴼⵔⵓ ⵅⴼ ⵓⵡⵇⵇⵔ ⵏⵏⴰ ⴷⴰⵔⵙ ⵉⵍⵍⴰⵏ ⵉ ⵜⵙⵏⵜⴰⵢⵜ ⴰⴷ ⵜⴰⵏⴼⴳⴰⵏⵜ. ⵎⴽⴷⴰ ⵉⵙⵙⵎⵖⵔ ⵎⴰⵙⵙ ⴰⵏⵙⵙⵉⵅⴼ ⵙ ⵜⵕⵡⵉ ⵏ ⵉⵎⵢⴰⵙⵙⴰⵜⵏ ⵉⵙⵔⵜⴰⵏⵏ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ, ⵎⴽⴷⴰ ⵉⵙⴷⴷⵉⴷ ⵅⴼ ⵜⵉⵔⴰⵜ ⵏ ⵜⴳⵍⴷⵉⵜ ⴰⴼⵍⵍⴰ ⵏ ⵡⴰⵍⴰⵢ ⵙ ⵉⵙⵙ ⵃⵎⴰ ⴰⴷ ⵜⵜⵉⵍⵉ ⴳ ⵡⴰⵏⴰⵡⵏ ⵏ ⵉⴳⵔⴰⵏ ⵙⵍⴰⵡⴰⵏ ⴰⴽⴽⵯ ⵉⴷⵎⵙⴰⵏⵏ ⴷ ⵉⵙⵖⵏⵣⵉⵜⵏ.
ⴹⴰⵕⵜ ⵎⴰ ⴳ ⵉⵙⵙⵎⵏⵉⴷ ⵢⴰⵏ ⵏ ⵓⵕⴰⵄⴰ ⵙ ⵓⵙⴳⵣⵍ ⴰⴼⵍⵍⴰ ⵏ ⵜⵏⴼⴰⵍⵉⵜ ⴷ ⵜⵥⵍⴰⵢⵉⵏ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉ ⵎⵉ ⵉⴱⴷⴷⴰ ⵡⴰⴷⴷⵓⵔ ⴰⴷⵙⵜⴰⵔ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵉⵙ ⴷ ⴰⵙⵇⵇⵉⵎ ⵍⴰ ⵢⴰⴽⴽⴰ ⵢⴰⵏ ⵓⵙⵎⴽⵍ ⴰⵅⴰⵜⴰⵔ ⵉ ⵓⵙⴱⵓⵖⵍⵓ ⵏ ⵉⵎⵢⴰⵙⵙⴰⵜⵏ ⵏⴳⵔ ⵜⵎⵔⵙⴰⵍ ⵜⵓⵣⵔⵉⴼⵉⵏ ⵙ ⵙⵏⴰⵜ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵉⵕⵍⴰⵏⴷⴰ, ⵖⵉⴽⵍⵍⵉ ⵉⵙⴰⵡⵍ ⵅⴼ ⵡⴰⴷⴷⵓⵔ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵉⴳⴰⵏ ⴰⵎ ⵛⴰ ⵏ ⵓⵎⴰⵍⵡⴰⵢ ⵉⴷⴷⴰⵏ ⴰⴷ ⵉⵙⴱⵓⵖⵍⵓ ⴰⵎⵢⴰⵡⴰⵙ ⴰⵙⵉⵏⵔⴰⵏ ⵙ ⵢⵓⵜ ⵏ ⵜⵏⴰⴼⵓⵜ ⵉ ⵜⵎⵙⴰⵔⵉⵏ ⵉⵙⵜ ⵓⵏⵀⵍⵍⴰ ⵉⵛⵛⴰⵔⵏ.
ⴷ ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵜ ⵏ ⵜⵏⵣⵔⵓⴼⵜ ⵜⴰⵎⵖⵔⴰⴱⵉⵜ, ⵢⵓⵍⵖ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴷⴷⴰⴷ ⵏ ⵉⵕⵍⴰⵏⴷⴰ ⵉⵙⴷⵓⵙⵏ ⵜⵉⵖⵜⴰⵙⵉⵏ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⵜⴰⵎⴰⴹⵍⴰⵏⵜ ⴷ ⵓⴼⵔⴰ ⴰⵏⴳⵔⴰⵏ ⵉ ⵓⵎⵙⵓⴼⵓⵖ ⵉ ⵓⵎⵏⵣⴰⵖ ⴰⴷ ⵉⵎⵥⵍⵢ. ⵎⴽⴷⴰ ⵉⵙⵙⴼⵔⴽ ⵎⴰⵙⵙ ⴰⵏⵙⵙⵉⵅⴼ ⵙ ⵓⵣⵎⵣⵣⵓ ⴰⴷ ⴰⴽⴰⴱⴰⵕ ⵏ ⵉⵕⵍⴰⵏⴷⴰ ⵅⴼ ⵡⴰⵏⴰⵡⵏ ⵏ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⴳⵎⵉ ⵜⴰⵏⴰⵎⵓⵏⵜ ⵏⵏⴰ ⵉⵍⵍⴰⵏ ⴳ ⵜⵙⴳⵉⵡⵉⵏ ⵏ ⵢⵉⴼⴼⵓⵙ, ⴰⵍⵏⴷⴰⴷ ⵏ ⵓⵙⵓⵔⵙ ⵏⵏⴰ ⴷⴷⵔⵏ ⵉⵏⵓⵎⴰⵥ ⴳ ⵜⵎⵔⵙⵉⵡⵉⵏ ⵏ ⵜⵉⵏⴷⵓⴼ ⴳ ⵢⵉⴼⴼⵓⵙ ⵏ ⴷⵣⴰⵢⵔ.
ⵙⴳ ⵎⵏⵉⴷ ⵏⵏⵙ, ⵢⵓⵍⵖ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵙⴽⴽⵉⵏⵏ ⵏ ⴱⵕⵕⴰ ⴷ ⵉⵙⴽⴽⵉⵏⵏ ⵏ ⵓⵎⵣⴰⵖ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵉⵕⵍⴰⵏⴷⴰ ⵜⴰⴷⵓⵙⵉ ⵏ ⵉⵎⵢⴰⵙⵙⴰⵜⵏ ⵉⵙⵔⵜⴰⵏⵏ ⵏⴳⵔ ⵜⵎⵉⵣⴰⵔ ⵜⵉⵎⴷⴷⵓⴽⴽⴰⵍ ⵙ ⵙⵏⴰⵜ, ⵢⴰⵏⵏⴰⵢ ⵉⵙ ⴷ ⴰⵙⵔⵓⵙ ⵏ ⵓⵎⵙⵇⴰⴷ ⴰⵎⴰⵢⵏⵓ ⵏ ⵜⵎⴰⵣⵉⵔⵜ ⵏⵏⵙ ⴳ ⵕⵕⴱⴰⵟ ⴳ ⵜⵉⴽⴽⵍⵜ ⵏⵏⵙ ⵜⴰⵎⵣⵡⵔⵓⵜ ⴷⴰⵜ ⵄⵍⴰⵢⵏ ⵙⵉⵏ ⵉⵙⴳⴳⵯⴰⵙⵏ ⵣⵔⵉⵏⵉⵏ, ⵉⴳⴰ ⵢⴰⵏ ⵏ ⵡⴰⵏⵥⴰ ⵅⴼ ⵜⵉⵔⴰⵜ ⵏⵏⵙ ⴰⴷ ⵉⴷⵓⵙ ⵓⵎⵢⴰⵡⴰⵙ ⴰⴽⴷ ⵜⴳⵍⴷⵉⵜ ⴷ ⵡⴰⵍⴰⵢ ⵙ ⵉⵙⵙ ⵖⵔ ⵢⴰⵏ ⵓⵙⵡⵉⵔ ⴰⵎⴰⴼⴰⵢ.
ⵎⴽⴷⴰ ⵉⵙⴷⴷⵉⴷ ⵎⴰⵙⵙ ⴼⵍⴰⵏⴰⵖⴰⵏ ⵅⴼ ⵜⵉⵍⴰⵍⵜ ⵜⴰⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⴷⵓⵙ ⵏ ⵜⴷⵉⵏⴰⵎⵉⵜ ⴰⴷ, ⴳ ⵓⵢⵉⵏⵏ ⵉⵙⵙⴼⵔⵓ ⵅⴼ ⵓⵏⴰⵔⵓⵣ ⵏⵏⵙ ⵏⵏⴰ ⴰⴷ ⵉⴱⵣⵔ ⵓⵔⴳⴰⴱ ⵉⴷⵎⴰⵏ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵖⴰⵔⵏ ⵏ ⵉⵕⵍⴰⵏⴷⴰ ⵉ ⵍⵎⵖⵔⵉⴱ, ⴳ ⵓⵙⴳⴳⴷ ⵏ ⵓⴱⵔⵉⴷ ⴷⴰⵜ ⵏ ⵢⴰⵏ ⵓⵎⵢⴰⵡⴰⵙ ⴰⵎⵙⵙⴰⵔⵓ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ ⴰⴷ ⵢⴰⵎⵓ ⵇⴰⵃ ⵉⴳⵔⴰⵏ.
ⴳ ⵓⴱⴰⵔⴰⵣ ⴰⴷ ⵏⵉⵜ, ⵉⵙⵇⵔⵔ ⵎⴰⵙⵙ ⴼⵍⴰⵏⴰⵖⴰⵏ ⵎⴰ ⵉⵙ ⴷ ⵍⵎⵖⵔⵉⴱ ⴷ ⵢⵓⵜ ⵏ ⵜⴰⵡⵡⵓⵔⵜ ⵏ ⵉⵕⵍⴰⵏⴷⴰ ⵖⵔ ⵓⵎⵏⵥⴰⵡ ⵏ ⵡⴰⴼⵔⵉⵇⵢⴰ, ⴰⵍ ⵉⵙⵏⵄⴰⵜ ⵉⵙ ⴷ ⵉⴹⴼⵕ ⵙ ⵢⵓⵜ ⵏ ⵜⴰⵡⵉⵜ ⵉⵏⴰⵡ ⴰⴳⵍⴷⴰⵏ ⴰⵎⴳⴳⴰⵔⵓ ⵙ ⵓⵣⵎⵣⵣⵓ ⵏ ⵓⴽⵜⵜⵓⵢ 48 ⵏ ⵜⵡⴰⴷⴰ ⵜⴰⵣⴳⵣⴰⵡⵜ ⵜⴰⵎⵙⵙⵏⵔⵓⵜ, ⴽⴽⵓ ⵉⵙⵉⵡⵍ ⵉⵏⵏⴰ ⵉⵙ ⴷ ⵜⴰⵎⴰⵣⵉⵔⵜ ⵏⵏⵙ ⵜⵃⵣⵣⵎ ⴰⴷ ⵜⵍⵜⵖ ⴳ ⵜⵎⴷⵔⴰⵡⵜ ⵉⵜⵜⵓⵎⵍⵖⵓⵏ ⵏⴳⵔ ⵜⴳⵍⴷⵉⵜ ⵜⴰⵎⵖⵔⴰⴱⵉⵜ ⴷ ⵓⴳⵎⵎⴰⴹ ⴰⴳⵔⴰⴽⴰⵍ ⴷ ⵓⴳⵎⵎⴰⴹ ⴰⵟⵍⴰⵏⵜⵉ.
ⵀⴰ ⴷ ⵎⵛⴰⵛⴽⴰⵏ ⵙ ⵙⵉⵏ ⵏⵏⵙⵏ ⵅⴼ ⵓⵙⴳⵓⴷⵉ ⵏ ⵉⵔⴳⴰⴱⵏ ⵏⴳⵔ ⵉⴱⵕⵍⴰⵎⴰⵏⵉⵢⵉⵏ ⵏ ⵜⵎⵉⵣⴰⵔ ⵙ ⵙⵏⴰⵜ ⴷ ⵓⵎⵙⴱⴹⵓ ⵏ ⵜⴰⵏⵏⴰⵢⵉⵏ ⵅⴼ ⵜⵓⴳⵜⵜ ⵏ ⵜⵎⵙⴰⵔⵉⵏ ⵜⵉⵙⵉⵏⵔⴰⵏⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵉⵍⴰⵏ ⴰⵏⵀⵍⵍⴰ ⴰⴱⵕⵍⴰⵎⴰⵏⵉ ⵉⵛⵛⴰⵔⵏ.